24 Januarie was Internasionale Onderwysdag, en 5 Februarie het Wêreldvoorleesdag gevier. Om hardop vir kinders voor te lees is inderdaad een van die beste dinge wat ons vir hul ontwikkeling en toekomstige akademiese sukses kan doen. Kinders met 'n groter woordeskat verstaan beter wat hulle lees, en leer ook makliker nuwe inligting. Jong kinders wie se ouers vyf keer per dag vir hulle lees, sal teen die tyd dat hulle vyf word byna 1,5 miljoen meer woorde hoor as kinders wie se ouers of versorgers nie vir hulle lees nie, volgens 'n studie deur die Ohio State University.
Die Prins Albert Munisipale Biblioteek het op 6 Februarie 2025 'n voorleesoggend aangebied met Graad R-3-leerders van Kweekvallei Kollege en Albert Kollege om die dag te vier en te help om 'n liefde vir lees by ons kinders te kweek. Reinie Smit, John Steyn, Nell Kruger, Charlien van Zyl en ek het beurte gemaak om die kinders te vermaak met stories en gedigte, kompleet met karakterstemme en baie dramatisering. Mnr. Steyn het die kinders betower met sy verhaal oor die "bokkies en die wrede wolf"!
Baie dankie aan almal wat dit 'n prettige en onvergeetlike ervaring vir ons kinders gemaak het. In die woorde van Dr. Seuss: “Hoe meer jy lees, hoe meer dinge sal jy weet. Hoe meer jy leer, hoe meer plekke sal jy besoek.”
